KBC-USA Announcement by Dr. Jum Maw San Awng
Tsaw ra hkungga ai magam gun ni,
Karai Kasang a chyeju hte America mungdan de Jinghpaw Wunpawng Hkalup Hpung masha ni du shang nga sai hta, Hkristu a hkum hkrang rai nga ai nawku hpung ni hpe gaw de sa wa ai lam ni mung nga shajang nga sai. Ndai zawn rai buga hpung ni hpe gaw de let nawku daw jau nga ai hta Jinghpaw Wunpawng Hkalup Hpung ni hku nna hpawng de ai ni nga ai zawn nkau mi gaw Kachin Christian Fellowship hku nna nga ai mung nga nga sai, Jinghpaw Wunpawng Hkalup Hpung ni hku nna gaw de da ai hpung ni hta mung Jinhpaw Wunpawng Hkalup Hpung Ginjaw hte American Baptist Churches (ABC ni hte ading tawk matut ai Hpung ni nga ai zawn nkau mi ginra masa hpung masha ni a masa hta hkan nna Jinhpaw Wunawng Hkalup Hpung hte ading tawk matut mahkai ai lam hta n manu ai majaw, shing n rai n jin ai, shing n rai independent hku nna nga mayu ai majaw Jinhpaw Wunpawng Hkalup Hpung hpe gaw de nna kara hte mung n matut ai ngu ai hku nna nga ai mung nga nga saga ai.
Dai hta nkau buga hpung ni gaw US kaw she du nga sai re majaw KBC ginjaw hte matut n ra sai nga nna hpung de ai mung nga nga saga ai.. US nga ai Baptist Church Body ni hte matut mahkai ai lam masa hta mung kara Baptist church body hte matut tim n ra ai ngu ai hta tinang buga hpung hte manu ai hta hkan nna matut mahkai ai lam ni mung nga nga saga ai. Kara masa lam hku mi raitim Hkalup Hpung ni hta nga ai awm dawm ahkaw ahkang hta buga hpung ni hpe gaw de ai re majaw yawng gaw shi hte shi rai nga saga ai.
Ndai zawn rai nna Buga hpung ni hpe gaw de nga ai hta:
(1) Texas Jinghpaw Wunpawng Hkalup Hpung (TXKBC, Fort Worth, TX, Indiana Jinghpaw Wunpawng Hkalup Hpung
( 2 )(IKBC, Indianapolis, IN),
(3) Michigan Jinghpaw Wunpawng Hkalup Hpung (MKBC, Grand Rapids, Mi) hte
(4) Hanson Jinghpaw Wunpawng Hkalup Hpung (HansonKBC, Houston, TX)
buga hpung ni hku na gaw hpung hpe hpaw ninghtan sa wa ai kaw nna Buga de nga ai KBC Ginjaw hte matut mahkai na matu daw dan let, dai hta sha n ga anhte hpe Hkalup Hkring htawng hte Madu a Mungga hpe sa du htawn tsun, pawn ba la ai American Baptist Churches (ABC, USA hte matut mahkai let shanhte a nawku hpung ni hku nna USA e hpung hpe gaw de na matut daw dan da saga ai. Ndai zawn rai nna Buga hpung mali ni hku nna Jiwoi Jiwa ni hpe jaw da ai Hkalup Makam Hkringhtawng lam hta rawt jat let Madu a ninghtoi tai lu na matu kahkyin gudin ai lam hpe mung galaw na ra ahkyak ai majaw,
laiwa sai October 26, 2013 ya hta KBC GInjaw kaw nna Ninagtau Ningbaw hte AMu Madu Kaba yan du ai aten hta Hkringhtawng lam, Nawku masa lam, nawku hpung up hkang masa lam hte sasana myit shingran bung ai Jinghpaw Wunpawng Hkalup Hpung mali hku nna Jinghpaw Wunpawng Hkalup Hpung Ni, USA (Kachin Baptist Churches, USA) hpe hpaw ninghtan dat saga ai lam shana dat saga ai.
Sara Kaba ni hku nna myiit shingran ai KBC USA ngu nna hpaw na lam hta Hkam la ai Karai Masa lam, Nawku daw jau ai lai masa, Nawku hpung a hkrang masa, Ginjaw ni hte matut mahkai ai lam ni hta shada shabung la ra na lam ni law law naw nga na re hpe mung mung mada nngai dai re ai. Dai re ai majaw lahta na buga hpung ni hku nna KBC Ginjaw hte ABC ginjaw hte matut mahkai let sasana bungli ni hta myit lawm hkum lawm shang lawm, shanhte a matsun maroi hpe hkam la nna, Jinghpaw Wunpawng Hkalup ni, USA (Kachin Baptist Churches, USA ngu nna hpaw ninghtan sa wa ai lam re hpe shana dat ga ai law.
Hkristu a magam hta,
Dr. Jum Maw San Awng
Coordinator
