Lai wa sai laban January 8, 2012 ya shana maga de Allentown, Pa USA kaw Wunpawng Myu sha ni marai 70 daram du zup let, 64 Lang na Jinghpaw Mungdaw Masat Ninghtoi lamang hpe ngwi pyaw awng dang ai hte galaw la lu sai. Lamang hta Tingnyang-up Slg. Tangbau Kamli, Danghkawwn hkungga jaw lamang hpe Shd. N-ka Zau Tawng, Shy.Lahkyen Ja Seng Mai kawn hkalum ga hte shana ra ai lam, Mungga hti shalai ai hpe Slg. Lasham Gam Bung litla woi mat wa ai. Dai hpang Myu shayi sha yan a GINRA ngu ai kahkrang, Shd. Lasi Gam Seng a yu tai mahkawn, Shawa yawng jawm shang lawm let, JINGHPAW BUGA ngu ai buga shakawn mahkawn jawm mahkawn ai. De hpang kanu kana Jan.Lahpai Ja Hkawn kawn hkum tsup ai hku Myu hte Mungdan a matu akyu hpyi woi awn ai. Dai ngut ai hpang Slg. Latsap Hkawng dau a laksan n-gun jaw ga hta mung, Myen ningbaw U NU hte NE WIN yan a Myen Myu kaba lailen masa hpe hkrang shapraw sa wa ai lam ni hpe azin ayang tsun jahpra sanglang dan mat wa sai. Bai Shd. N-ka Zau Tawng woi awn let, du wa na Febuary 5, 2012 ya Rawt Malan n-htoi hte seng n-na, bawng jahkrup ginrat ai lam galaw la ngut ai hpang Shd. Gawvak Dau Ze kawn hpungdim hte lu sha a matu kyu hpyi, du sa masha yawng mung malu masha jawm lu sha, shachyen shaga rai let, lamang hpe ngwi pyaw awng dang ai hte galaw la lu sai. Lamang hta sa du shanglawwm ai ni hte lit garan gun hpai shang lawm mat wa ai ni yawng, Wunpawng Buga hte Mungkan shara shagu hta Myu hte Mungdan Magam gun hpai ai ni yawng a n-tsa, Wa Karai Kasang shaman ya u ga ngu kyu hpyi myit dum let, grai chyeju dum sai lam hte shiga hpe shana dat ga ai.
0 comments