Tsinyam alu tam ai hta, “Duwa na February 20 Hkang Amyusha Nhtoi (Chin National Day) poi lamang hta Jinghpaw shat malu masha dut na hte Raffle (gam chyam lakmat) hpaw poi lamang galaw na matu myit hkrum dawdan da ai,” nga nna, zuphpawng shanglawm ai Slg. Lahpai Zau Lawt kawn KNG Jinghpaw Shiga Dap de tsun wa ai re.
Shi matut tsun ai hta, ya na zawn galaw ai gaw, Jinghpaw mungdaw kata hta matut nna garum ningtum ni ra kadawn nga ai, yak hkak hkrum nga ai hpyen yen masha ni hpe garum lu na matu hte, Jinghpaw Wunpawng amyusha ni hte Hkang amyusha ni gaw sai rum ai hpu nau ni re ngu ai hpe sakse madun ai hku nna mung galaw ai lamang re nga tsun ai.
Maning laman mung, Amerikan mungdan hte mungkan shara shagu chyam bra nga ai J.W sha ni hte kaga hpunau amyusha ni gaw alu tam ai lamang amyu myu hku nna lamang ni galaw let, Jinghpaw tsinyam ni hpe dangdi dangdep ai daram garum wa sai rai nga ai.
Dai hta Australia mungdan hte kaga mungdan ni hkan du nga ai, Hkang hpunau ni kawn, lai wa sai 2011 ning hta, Jinghpaw mungdaw kata na hpyen yen tsinyam ni a matu Myen gumhpraw kyat sen 500 daram garum wa sai rai nga re.
Jinghpaw mungdaw kata, majan matut manoi byin nga ai rai nna, hpyen yen tsinyam ni mung grau law jat nga ai hte, ya ten Wunpawng Mungdan Shanglawt Hpung/Hpyendap (KIO/A) up hkang ai shara ni hte Miwa ga jarit de du nga ai hpyen yen tsinyam 50,000 jan rai sai re.
Hpyen yen tsinyam ni law wa ai hte maren, garum ningtum lam ni grau ra kadawn nga ai hte, Mungkan Wunpawng Hpung (UN) a rung lakying ni rai nga ai, Yangung daju UNICEF, UNHCR hte UN-OCHA rung na Myen magam gun masha ni gaw maning December 12 ya hta KIO ginjaw Laiza tsinyam dabang de kalang sa du garum jaw ai hta lai nna, matut garum jaw ai lam n nga shi ai.
bY:KNG/chin/kachin USA news group
0 comments