KTO-USA: Miwa Asuya hku Anhte Munghpawm Dinghku hta Shalau Achya ai hpe Ninghkap ga

Miwa Asuya hku Anhte Munghpawm Dinghku hta Shalau Achya ai hpe Ninghkap ga

Posted by Admin Monday, October 3, 2011

Dai ni na aten hta, anhte Wunpawng amyu sha ni anhte a n-gup ga/laili laika hpe anhte Mungdan kata nan hta e tara n-shang laili laika rai sani ai. Anhte a kashu kasha ni mung tinnang a laili laika, htung hkring, hte labau ni hpe tinnang a buga kata hta e sharin ahchyin ai ahkaw ahkang n-lu saga ai. Myitkyina Dakasu Kaba a shingdu na nam sum wum ni hta mung condom hte tsi htu samyit ni she kaput nga saga ai. Dakkasu a nam dum ni hta mung tsi htu samit bang na hpri shingnoi ni hte she shakum ntsa noi abya da nga ai. Shaning shagu Dakassu ngut sai jawng ma ramma ni mung tinnang Mungdan Asuya magam gun na ahkaw ahakng nlu saga ai. Anhte a Hkristan nawkaw jawng ni mung tara shang nawku hpung gaw gap na ahkaw ahkang nlu mat saga ai. Anhte a lamu ga ni hpe eka sen hku nna zing gashun la n-htawm Myen Asuya ni hte ni nawn ai hpaga la ni hpe latup jaw kau mani ai. Ya na Wunpawng Amyu sha ni hpe jahten sharun ai madang gaw Japan Koloni prat hta pyi grau ai hpe mu mada lu sai. Numbat 2 Majan Kaba hta e, anhte amyu sha ni a Kachin Ranger ni gaw Dukaba Chiang Kai-shek a hpyen hpung hte rau Facist Japan ni hpe Miwa hte Myen mungdan kaw nna gawt shapraw kau saga ai. Yawn hpa gaw, dai ni du hkra anhte buga kata kaw Facist Asuya naw nga nga ai nan rai mali ai. Munghpawm hta shanu nga ai Wan 62 hpe damya mya nna jahkrit sha ma nna gasu gabrawng let mang hkang ni hpe sinnat hku kaw na mahtai tam chye ai lailen hte uphkang nga ai 1962 kaw na dai ni du hkra rai mali ai.

Lai mat sai kru shi mali ning hta, Bokyoke Aung San hku nna Wunpawng Salang ni hte kaga amyu bawsang ningbaw ningla ni hpe Myen mungdan hte shanglawt arau la na matu sa zinlum we ai. Wunpawng amyu sha ni a Hpu Shawng Hpuba ni hpe jet let Federal Munghpawm hte mungchying sha ni yawng hpe rap ra let uphkang ai munghpaw hpe A-RAU sha gawgap wa lu na hpe mung Myen Hkringmang Daju hku nna gasadi jaw saga ai. Amyu kaba Mali (Sam, Myen, Hkang, Wunpawng ni) hku nna Pang Long gasadi hpe 1947 ning hta ta masat htu let munghpawm ning nan hpe Munghpawm Myen Mungdan nga nna mying shingteng wa saga ai.

2010 ning hta, tinnang a tinnang shatsam la ai hpyen palawng raw Asuya lung wa ai hpang, anhte bum nga masha ni hpe grau grau nna shingnawm de htu masut wa, dip rip wa ai hpe hkam sha wa ga ai. Anhte Bum nga masha ni gaw tinnang buga tinnang ginra kata hta e numbat 2 (grit nyem ai) mung chying masha ni rai nga ai gaw ga lahtum n-shut rai mani ai. Dai hta, Miwa Asuya hku nna myi di chyip lam amyu my hku nna garum madi shadaw nga ai gaw ndai Matse Labye Asuya hpe prat ding grin anhte amyu ni hpe dip rip up sha na matu ahkang aya jaw wa ai zawn hkam sha wa ga ai. Lahta na ginlam ni a majaw, Miwa Gumsan Mungdan mungchying sha ni yawng, Myen Munghpawm mungdan munghcying sha ni yawng, hte Mungkan ntsa nga pra nga ai amyu hpan yawng hku nna ZINLUM let, ndai Matse Labye Tsadan hpe simsa nna ninghkap GUMLAU kau ga ngu nna saw lajin dat nngai.

Anhte ni Miwa Asuya hpe hpyi shawn mayu ai nsen:

1) Myen mungdan na Facist Asuya hpe garum ai lam hpe jahkring na.

2) Munghpawm Myen mungdan kata hta e gaw gap nga ai bungli yawng mayawng hpe teng man san pra ai asuya lung wa ten du hkra lat ya na lam.

3) Bum nga masha ni hpe gawng malai tai ai uhpung hpe matut mahkai nna mahkri shawn na matu ra sharawng ai lam.

4) Miwa mungdan a sinna hkran na tsinyam hkam sha nga ai htingbu ni hpe mungdan wang chying hka hpaw let garum ya na lam.

Bat 5ya, Oct 7 ya, 2011

3:00 PM-6:00 PM

3505 International Place NW

Washington, DC

gumsan@kachinland.org

202-500-5076