Kalang mi na Mali Hka a sinna hkran mare kaw nga ai Ah Zau gaw sinpraw hkran mare kaw nga ai Ah Mai hpe tsawra ai majaw Wawn, Hka Li jawn let sa dam dam rai wu ai. Dai hpang Ah Zau hte Ah Mai gaw kaja wa sumtsaw byin wa masai. Dai hpang Ah Zau gaw Ah Mai hpe hkungran la na nga Ah Mai ni a dum nta de Ja, Hpaga, Shat lit, Bau ni gun let Num sa hpyi wu ai. Rai tim, Ah Mai a Kanu yan Kawa gaw myit nhkrum, njaw sha ai hte Ja Hpaga mung nhkap la ai majaw Ah Zau gaw shi gun sa ai Ja, Gumhpraw, Shat lit, Bau ni hpe Mali Hka ka-ang e yawng ru bang kau wu ai.
Dai hku byin hkra rai tim Ah Zau gaw Ah Mai hpe tsawra ai hte nmu yang nnga lu ai majaw Ah Mai hpe sa hprawn la wu ai. Raitim, Ah Mai a Kanu Kawa ni bai sa hkan mu la nna Ah Mai hpe bai woi la kau ya wu ai. Ah Zau mung myit nhtum ai sha Ah Mai hpe bai sa hprawn la nna Ah Mai a Kanu yan Kawa nchye ai shara, tsan ai de shan lahkawng myi di chyip hkawm sa mat nna deng latsa jan tsan ai mare kaw Ah Zau gaw rung langai mi kaw bungli galaw wu ai. Ah Mai mung dai mare kaw na Jawng Saranum galaw let shan yan a dinghku hpe de hpang wa ma ai.
Dai hpang lahkawng ning daram hta Ah Mai gaw kasha langai hte Myitkyina de Dakkasu jawng sa shangut la na matu shi a Kanu yan Kawa hpang de lai wa let jahkring mi wa shang rai tim, Ah Mai a Kanu yan Kawa gaw Ah Mai hpe wang kata pi nshang shangun ai sha gawt shapraw kau ai hkrum wu ai. Ndai zawn Ah Mai a prat hta myit npyaw lam ni law law hte sha ding hku de sa ai masum ning du wa ai shaloi Hkungran Ga Shaka hkam la ma ai. Raitim, Ah Mai a prat hta shi a Kanu yan Kawa, Kahpu kanau, kana ni a myit nhkrum ai hte Ah Zau a myit nsu, nchye myit nchye tau ya ai lam ni a majaw myit dik myit pyaw ai lam shi hta nlu la wu ai. Ndai zawn manga ning jan de shang wa yang shan gaw kasha Num sha lahkawng hte La sha langai lu masai. Raitim, Ah Mai gaw shi grai tsawra ai shi a Kanu yan Kawa a tsawra myit mung nlu la, shi tsawra dik ai Ah Zau a gawn lajang yu garum ai lam mung shi nlu la ai majaw hpang jahtum gaw Yu Tsi sha nna shi grai tsawra dik ai Ah Zau hte kasha ni marai masum hpe dinghta ga na shakram kau da wu ai.
Ndai mabyin gaw kaja wa byin lai wa sai re lam sakse hkam dat lu nngai.
Ka lajang ai,
Ja Yaw Nshang Hku
0 comments