Myen hte Miwa ni Mangshi kaw bawngban ai lam (KNG, June 25, 2011) hte seng nna, Miwa ni KIA hpe gasat na matu Myen ni hpe Miwa ga lang na ahkaw ahkang jaw na kun? Ngu ai hpe myit yu shara rai nga ai. Miwa Gumsan mungdan gaw Mungkan Wunpawng Hpung (UN) kaw security council aten hpring malawm rai nga ai. Shanhte a Mungdan kata de kaga mungdan langai ngai na Hpyen hpung ni lai bang na ngu ai gaw, Yunnan Asuya sha dawdan nna ngut ai baw n rai nga ai. Dai majaw, mai byin ai masa gaw, Miwa phone hte internet lang taw ai KIA a lam hpe sagawn la na matu karum hpyi ai mai byin ai. Bai nna, KDA ni sa dung lawm ai ngu ai gaw, KIA hpe gasat na matu ngu ai hku nna bawngban ai mung rai yang she rai na re. Raitim, KDA ni mung myit hkrum lawm ai ngu ai hpe Myen ni shiga shabra ai mai byin nga ai. Dai hku shabra na matu dingsang woi sa ai mai byin nga ai. Dai gaw myit masa majan langai mi rai nga ai. KDA kata kaw mung Jinghku hkrai re majaw, Du ni myit n su tim, hpyen la ni chye myit na ma ai. Dai gaw n tsang ra na re. Bai nna, Shanglawt ni a hpyen dap langai lahkawng hpe sha kashun la nna, majan shazim lu na n re, ngu ai hpe Miwa ni mung sawn da chyalu rai na ma ai. Ga jarit kaw gasat ai shaloi, Miwa hkran de sinat pala ni lai bang chyalu re ai hpe Miwa ni mung chye na ma ai. Raitim, KIO/KIA hpe matut gasat yang hkra wa na manghkang ni hte seng nna, Miwa hpe tauhkrau sa tsun ai chyawm gaw mai byin nga ai. Myen ni na masing hta chyawm gaw Rawt Malan uhpung yawng hpe matut gasat na matu shajin da chyalu re lam chye lu ai. Laiza hte Maija Yang hpe chyawm gaw Miwa Mung maga hku n rai tim, matut gasat yang gasat wa chye ai. Dai hpe gaw sadi ra ai hku re.
KIA ni hpe gasat na matu yak ai lam hta hpan amyu myu nga ai hpe Hpyen ni chye ma ai. Majan training grung ai (moi de kaga rawt malan hpung ni hpe pyi training jaw ai re). Hpaji chye ai ni woi awn ai. Nhprang sutrai arang grai nga ai majaw tinang lagaw tinang tsap lu ai. Moi de Miwa ni a lakung lakap Communist ni hpe pyi KIA ni gasat shamyit ai re majaw, Miwa ni kaw shamyet shanat ai uhpung n re ai hpe Miwa ni chye nga ai. Bai nna, shara dam lada ai. Hpyen masa hta shara kaja grai lu madu da ai. KIO/KIA ni hpe kade gasat tim dai ni du hkra yawm mat ai ngu n nga, grau grau nna lam shagu hta rawt jat wa ai hpe chye ma ai. Dai majaw Miwa ni mung shanhte Mungdan kata na zawn Mungdan langai hta Policy lahkawng masum (Hongkong, Macao, Taiwan) mai nga ai, ngu ai hpe hkap la ma ai.Shaloi gaw Myen ni majan shazim na i? Galoi n zim ai, Myen ni mung gasat magang grau grau nna kung wa ma ai. Dai majaw, mai byin ai daram jahkrum na ahkaw ahkang pru shagu, gasat ai hpe shazim nna, tinang a ahkaw ahkang hpe mung tsun shakut ding yang rai yang kaja na re. Dai zawn aten galu gasat sa wa na hkrun lam hta mung shawa hte seng ai (Public policy) hpe jahkrat nna, Mung shawa hpe makawp maga na masing hte rau, shakut sa wa na matu dinglun dat nngai law.
0 comments