KTO-USA

Hpyen Yen Dabang De
Tsaw Ra Hkungga Mungmasha, Daini anhte gam maka,
Ndai zawn hprawng yen hkawm ra tim, Hpawt ni Majan zim;
Daini myiprwi pru nga ra, Hpawt ni kabu na.
Myit naw g’lu ga tsun mayu, Kade n na akyu pru;
Kaman lila n re yaw, Amyit hpe naw shaja ga law;
Hkam sh’rang ai gaw Tsi Kaba, Hpang de awng dang lam rai nga.
Yehowa myit grai tsaw ai, Anhte myit hte wash’kap shai,
Shi a myit hte anhte myit, L’mu hte aga n mai grit;
Akyu hpyi shaja ten shagu, Shada put pai hkum nga lu;
Shada Tsawra myit tawn da, Yesu Tsawra myit Ningja.
Hparai ningrai byin ga ai, Ningpawt kaw na sumru chyai;
Nang shoi nang sha hkum dinglun, Kadai mung m’ra hkum shagun;
Yehowa shi grau chye ai, Anhte a gam M’ka ndai;
Dum nta de hkum majen, Tut nawng akyu hpyi ginlen.
Ga li ga galaw n mai nga, Tsadan a man gaya hpa;
Myit n hkrum magang shi kabu, Tsadan tahpawk dum na lu!
Htaning hpa n sha hkum myit ru, K’rai bau na kam sham u;
Hprawng yen dabang nga law laman, Hkamja lam hpe sha makran rai nga ga lu oi.
Shanglawt Tsing
(30.6.2011, 7:10Am)
Page 2
2
Masu Ndum
Rawt Malan 50 nig L’pran, Ne Win aprat kaw na nan;
Daini du hkra Kyang n lai, Masha hkum sha she galai;
Myit kyang lailen maren sha, Maka n kap dik masa;
Sadi n dung ladu lai, Madang n nga akyang dai;
Wa g’ya dik na zawn galaw, Kanawn n pyaw dik ai yaw.
Panglung ga s’di majaw she, Myen mung Shanglawt la ai me;
Daini shi m’nu n tawn wa, Aten lai mat sai she nga;
Ga s’di dung na shi n chye, Hpa rai kun nga she ahkre;
Mungdan up hkang na n-gying, Bawnu nau n hpring;
Lachyum n nga Mung up Du, Shadun da tim lachyum n pru.
Simsa na lam bawng ban ai, Ndang hti hkra she rai sai,
N-gup ga hte sadi tawn, Laika hta ta masat shawn;
Anhte kade s’di dung tim, Galoi mung shi chyu s’di zim;
Kalang sha pyi s’di n dung, Shi a ntsa she mau hkung;
Gaya chye baw shi n rai, Kam ram ai wa shi n tai.
Daini shi hte kadai n ram, Manu mung kadai tawn n kam;
Myit hkrum tawn da ai ga s’di, Hkying hkum mi L’pran ga shadi;
Kalang lang nhtoi lapran, Kalang lang shata laman;
Aten gadun sha hkam ai, Shi hte g’law ai ga s’di dai;
Sadi dung ai anhte rai, Mana ni pyi shi sh’du sai;
Ya gaw anhte m’nu manat, Ahkaw ahkang hpe n tat.
Du na ra ai ten ni hta, Bawngban ga sadi magra;
Rawt Malan Mungdaw yawng lawm, UNFC hkyawm;
Tara hpe shatup ya lu, Mungdan langai ngai machyu;
Shingnrai,
Mungkan Uhpung langai ngai, Shang tsap lawm ai lai;
Dai sha n rai s’di n da, KIO kawn myit hkrum daw dan da sai rai.
Shanglawt Tsing
(30.6.2011, 8:20Am)
UNFC = United Nationalities Federal Council
Ref: Pyilan (27.6.2011)