Maigan myu sha ni nkau myi hte hpu nau Hkang,Mon,Myen hpung gyi,Sumlahkrung ning hkring kyaw tu ni pyi an hte Kachin hpe matsan dum myit hte naw karum ya nga ai.An hte jinghpaw wunpawng myu sha nkau myi gaw n garum ai hta n ga myusha shada byet tai nna ding bai ding na jaw nga ai.Karai wa e ndai ni a myit masa galai shai nna myu sha shada lawan zin lum lu u ga kyu hpyi ai law.Dai sadi run ai myusha byet ni Kade a matu wa shakut nga ai kun asan sha chyena shangun ya mi ga law."He sadi run ai byet tai taw ai wa nang," Tinang sai daw sai chyen ni sum machyi jam jau,sihtum wa ai lam hpe nang mu lu nna myit pyaw nga a ni?Lani myi na baw kaw dai nang kam ai Myen tsadan wa adup dumpa kau ya na dum nga a ni?Karai wa e ndai sadi run ni a shu mashi shumasha prat ding sa yu azi je yang ya mi ga law.
-------------------------------
PAN SE SA LAM KAW GAP
November (27) Laban,
November (26) ya jahpawt daw hkying (7:30am) ram hta Wunpawng Mungdan Shanglawt Asuya Ba (5) Ginra rai nga ai Namsan Yang a sinna ding dung mile (2) ram tsan ai Pan Se sa lam gaw KIA myu tsaw share shagan ni hte myen asuya a hka-ma-ya (384) na hpyen hpung ni gasat lai wa sai lam na chye lu ai. N dai hta myen maga na (2) si hkrum wa sai lam hpe mung matut chye lu ai.
-----------------------
SHA EIT PA KAW GAP
November (27) Laban,
Wunpawng Mungdan Shanglawt Asuya a Dap Ba (5) ginra rai nga ai Wu Yan sa lam Sha Eit pa kaw Ginjaw Shim Hpung na Dujum Brang Dut woi awn ai myut saw hpyen hpung ni hte myen asuya dap hka-la-ya (40), hka-ma-ya (383), (384) ni November (26) ya jahpawt daw hkying (9:25am) ram hta laja lana gap gasat ai lam na chye lu ai. N dai gasat ai hta KIA myu tsaw share shagan (3) hkrat sum nna, (4) hkala hkrum wa sai lam hte myen maga na hkrat sum ai lam hpe hkrak n chye lu shi ai.
-----------------------
MARU, AU RA KAW MYEN HPE HKAP GAP
November (27) Laban,
Wunpawng Mungdan Shanglawt Asuya a Dap Ba (3) ginra rai nga ai Sinlum Kaba kawn Maru, Au Ra de yu wa ai myen hpyen hpung ni hpe KIA myu tsaw hpyen hpung ni November (26) ya shana de hkying (6:30pm) ten hta hkap gap ai majaw gasat poi byin wa sai lam shiga na chye lu ai.
------------------------
HPUNDU KAWNG DE MYEN 10 JAN HKRAT
November (27) Laban,
November (26) ya shani daw hkying (2:00pm hte (3:00pm) lapran Wunpawng Mungdan Shanglawt Asuya a Dung (1) na KIA myu tsaw share shagan ni hte mung shawa hpyen hpung (MHH) ni gaw Kaihtik makau Hpundu Kawng mayan hta myen asuya hpyen hpung ni hte gap gasat ai lam byin wa sai lam na chye lu ai. Myen maga na marai (10) jan hpe lu gap kau sai lam mung na chye lu ai.
----------------------
MAM CHYANG HTE GAI HTAU KAW GAP
November (27) Laban,
Wunpawng Mungdan Shanglawt Asuya a Dung (27) gin rai rai nga ai Mam Chyen hte Gai Htau maga de Dung (27) na KIA myu tsaw share shagan ni hte myen asuya hpyen dap tat-ma (99), (11) pawng hpawm dap ni hte November (26) ya jahpawt daw hkying (10:30am) ram hta laja lana gasat lai wa sai lam na chye lu ai. N dai gasat poi hta myen de na marai (20) jan si hkrum wa sai lam hpe mung na chye lu ai.
---------------------
DU KABA TU JA WOI AWN HPUNG NI MYEN HTE GASAT
Wunpawng Mungdan Shanglawt Asuya a Dap Dung (15) ginra rai nga ai Mamda, Hpakawn, hte Hka Rawm kawng ni hta ZD 254 na Du Kaba Tu Ja woi awn ai KIA myu tsaw share shagan ni kawn myen tai hpyen ni hte November (26) ya shana de (5:30pm) ten hta gap gasat lai wa sai lam shiga na chye lu ai.
--------------------
SHAKUM YANG KAW GASAT
November (27) Labang,
Wunpawng Mungdan Shanglawt Asuya Dung (3) na KIA myu tsaw share shagan ni gaw Shakum Yang hkau na pa de du nga ai myen asuya tat-ma (88) hpyen hpung ni hte November (26) ya shadaw de maga hkying (3:40pm) ram hta gasat lai wa sai lam shiga na chye lu ai.
---------------------
DUNG (36) GAP, MYEN (6) HKRAT
Noveber (27) Laban,
Sam Mung Muse maga de htu lung wa ai myen hpyen hpung ni hpe Sam Mung daju Dap Ba (4) npu, Dung (36) myu tsaw share shagan ni November (25) ya shani hkying (11:30 am) ten hta Munggu lam , Nawgu, Namsu hte Munggu Manje shara (3) hta ambush hkap gap gasat ai lam na chye lu ai. N dai zawn hkap gap gasat ai hta myen hpyen la marai (6) si nna, marai (4) hkala hkrum ma ai lam na chye lu ai. Munggu Manje makau hta hkap gap ai hta myen ni gaw shanglawt hpyen la ni hpe tam n mu jang, Kawng Kang mare maga de myawk-motar ni hte gap bang wa lam hpe mung na chye lu ai. Matut nna, Hpawng Seng lam de mung myen hpyen la ni bai htu lung wa nga ma ai lam chye buga masha ni kawn na chye lu ai.
MATUT HTI NA »
Labels: Jinghpaw Mung Shiga
0 comments